FEDHA MWIBA MCHUNGU KWA YANGA MWAKA 2017

Na Kione Hamis Mahuruku.

         Ukiitazama vizuri Yanga huioni kama ni Timu hasa iliyojiandaa kwa kugombania Ubingwa au kushindana katika Klabu Bingwa Afrika.Mtu akikuuliza kwa nini? Jibu lake ni jepesi tu…..! Yanga hawana Fedha.Ndio,kwa nini Fedha? Yanga kwa mwaka 2017 ni mwaka mchungu kwao hasa kipindi kile aliyekuwa Mwenyekiti wao Yusuf Manji alipokuwa matatizoni na Serikali.Ikapelekea Yanga ipoteze mwelekeo hasa ikizingatiwa Manji ndio alikuwa kila kitu.

          Kukosekana kwa Fedha kwa Klabu ya Yanga ndio inapelekea leo hii wawe katika kujilaumu,kutupiana lawama na hata kuwachukia Zaidi watu wenye kariba ya mtazamo wa Mzee wao Akilimali.Pamoja na kukosa Pesa kwa Yanga,lazima Yanga wenyewe wajipe pongezi ya uvumilivu.Wameweza kuvumilia hali yote hiyo na hata kufikia kuwa katika nafasi nzuri katika msimamo wa ligi.

              Kuna kitu nilikiona kwa Yanga,na hata siku moja katika vikao vyao na Waandishi wa Habari nilimuuliza Msemaji wa Timu ndugu Dismas Ten pamoja na Katibu mkuu Mwalimu Boniface Mkwasa juu ya utaratibu wa usajili wao.Swali langu nilitaka kujua,kwa nini Yanga imemuongeza Yohana Nkomolwa wakati tayari ina “Watoto” kama Said Mussa,Yusuf Mhilu,Akilimali na hata Mwashiuya japo ana uzoefu na ligi? Lengo lenu ni nini Yanga wakati mnakabiliwa na mashindano magumu ya Klabu bingwa Afrika,ikiwa mnajua wachezaji wenu Ngoma,Tambwe,Kamusoko ni majeruhi?

           Na je,kulikuwa na ulazima gani wa kuongeza vijana katika kikosi wakati tayari vijana mnao na hamjaanza kuwatumia ipasavyo? Kwa nini nafasi hiyo msitumie kuongeza walau “Striker” mmoja aliyekamilika”matured”? Lakini nikaonekana kama simpendi Yohana Nkomolwa na Yosso wengine wa Jangwani.Mimi ni muumini mkubwa wa watoto wadogo lakini lazima tukubali,kwa sasa Yanga haikuwa na hitaji la kuongeza watoto kikosini.Yanga ilihitaji Zaidi wachezaji waliokamilika ili wawapambanie kikamilifu katika mashindano yanayowakabili.

           Kwa mwelevu utabaini na kung’amua kwamba inshu haikuwa mipango ya kuongeza wigo kwa vijana ndani ya Klabu,bali shida ilikuwa Fedha.Fedha imepelekea kuwakosa Wachezaji wengi wa kiwango cha juu wenye hadhi ya kuchezea Yanga na si Wachezaji wa kuja kujaribiwa Yanga.

           Jana baada ya kufungwa na Mbao magoli mawili kwa sifuri magoli ya ‘Kinda’ Habib Kyondo nadhani Yanga watakuwa wamegundua kwamba ni aina gani ya Washambuliaji walio nao.Tegemezi lilikuwa kwa Obrey Chirwa na Ibrahim Ajib nao hawakuwepo kikosini kwa sababu tofauti.

             Iwapo Yanga wangekuwa na Washambuliaji wengine wa kariba ya Ajib na Chirwa wangeendelea kuwa Wateja wa Mbao katika Dimba la CCM Kirumba? Kabla hujatazama mbinu na uwezo wa Mwalimu msaidizi wa Yanga Shedrak Nsajigwa kwanza angalia uwezo wa Wachezaji wa Yanga waliocheza jana.

            Yanga ni wavumilivu,endeleeni kuwaombea Wachezaji walio na majeraha warejee mapema maana Klabu Bingwa Afrika ni hatari Zaidi kuliko hayo mashindano ya Mapinduzi.